(БҰРЫНҒЫ РЕДАКЦИЯ) ҚАЗАҚСТАН РЕСПУБЛИКАСЫ ІШКІ ІСТЕР ОРГАНДАРЫНЫҢ ҚЫЗМЕ...

Осы редакция 2018 жылғы 28 қыркүйекте енгізілген өзгерістеріне дейін қолданылды

Қазақстан Республикасы

Ішкі істер министрінің

2011 жылғы 27 мамырдағы

№ 246 бұйрығына

9-қосымша

Қазақстан Республикасы ішкі істер органдарының қызметкерін тәртіптік жазаға тарту
ережесі

(2016.20.05. берілген өзгерістер мен толықтырулармен)

1. Қызметкерлерге қолданылатын тәртіптік жазалар

1. Ішкі істер органдарындағы тәртіптік жазалар тәртіптік жауапкершілік шарасы болып табылады.

ҚР Ішкі істер министрінің 2016.20.05. № 545 бұйрығымен 2-тармақ жаңа редакцияда (бұр.ред.қара)

2. Қызметтік міндеттерін орындамағаны немесе тиісінше орындамағаны үшін қызметкерлерге:

1) ескерту;

2) сөгіс;

3) қатаң сөгіс;

4) қызметке толық сәйкес еместігі туралы ескерту;

5) атқаратын лауазымынан босату;

6) арнаулы атағын бір сатыға төмендету;

7) ішкі істер органдарынан шығару;

8) ішкі істер органдарының басшылары немесе уәкілетті басшылары берген немесе марапаттаған құрметті атақтарынан, төс белгілерінен айыра отырып, ішкі істер органынан шығару;

9) арнаулы атағынан айыра отырып, ішкі істер органдарынан шығару тәртіптік жаза түрлері қолданылады.

ҚР Ішкі істер министрінің 2016.20.05. № 545 бұйрығымен 2-1-тармақпен толықтырылды

2-1. Осы ереженің 2-тармағы 9) тармақшасында көзделген тәртіптік жаза қызметкерді «Құқық қорғау қызметі туралы» Қазақстан Республикасы Заңының 80-бабы 1-тармағының 13) және 14) тармақшаларында көзделген теріс себептер бойынша жұмыстан шығару кезінде қолданылады.

3. ІІМ оқу орындарының курсанттарына (тыңдаушыларына) тәртіптік жазалардан басқа, сондай-ақ нарядқа - 2 нарядқа дейін жұмысқа тарту және әскери есепке қоя отырып, оқу орнынан шығару жөніндегі қосымша жазалар қолданылады.

2. Тәртіптік жаза салудың негіздері мен шарттары

4. Қызметкердің тәртіптік теріс қылық, құқық бұзушылық пен құқыққа қарсы басқа да іс-әрекеттерді жасауы тәртіптік жаза салу үшін негіз болып табылады.