(БҰРЫНҒЫ РЕДАКЦИЯ) ҚР ҮКІМЕТІНІҢ 2007.28.06 № 544 ҚАУЛЫСЫ

Жолаушылар тасымалдау жөніндегі қызметті лицензиялау ережесін
 және оған қойылатын біліктілік талаптарын бекіту туралы
Қазақстан Республикасы Үкіметінің 2007 жылғы 28 маусымдағы № 544 Қаулысы

(2007.13.11. берілген өзгерістер мен толықтыруларымен)

Осы редакция 2010 жылғы 30 қарашада енгізілген өзгерістеріне дейін қолданылды

«Лицензиялау туралы» Қазақстан Республикасының 2007 жылғы 11 қаңтардағы Заңына сәйкес Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған:

1) Жолаушылар тасымалдау жөніндегі қызметті лицензиялау ережесі;

2) жолаушылар тасымалдау жөніндегі қызметке қойылатын біліктілік талаптары бекітілсін.

2. Қосымшаға сәйкес Қазақстан Республикасы Үкіметінің кейбір шешімдерінің күші жойылды деп танылсын.

3. Осы қаулы ресми жариялануға тиіс және 2007 жылғы 9 тамыздан бастап қолданысқа енгізіледі.

Қазақстан Республикасы

Үкіметінің

2007 жылғы 28 маусымдағы

№ 544 қаулысымен

бекітілген

Жолаушылар тасымалдау жөніндегі қызметті лицензиялау

 ережесі

1. Жалпы ережелер

1. Осы Жолаушылар тасымалдау жөніндегі қызметті лицензиялау ережесі (бұдан әрі - Ереже) Қазақстан Республикасының «Лицензиялау туралы» 2007 жылғы 11 қаңтардағы, «Темір жол көлігі туралы» 2001 жылғы 8 желтоқсандағы, «Ішкі су көлігі туралы» 2004 жылғы 6 шілдедегі, «Сауда мақсатында теңізде жүзу туралы» 2002 жылғы 17 қаңтардағы Заңдарына сәйкес әзірленді.

2. Ереже темір жол, теңіз, өзен көлігімен жолаушылар тасымалдауға лицензиялар берудің тәртібін белгілейді.

ҚР Үкіметінің 2007.13.11. № 1078 Қаулысымен 3-тармақ өзгертілді (бұр.ред.қара)

3. Теңіз, өзен көлігімен жолаушылар тасымалдау жөніндегі қызметпен айналысу құқығына арналған лицензияларды және (немесе) лицензиялардың қосымшаларын Қазақстан Республикасы Көлік және коммуникация министрлігі Көліктік бақылау комитетінің аумақтық органдары (бұдан әрі - лицензиар) береді.