«Шетелдіктердің және азаматтығы жоқ адамдардың шекаралық аймаққа кіруіне рұқсаттама беру қағидаларын және Қазақстан Республикасы Үкіметінің кейбір шешімдеріне енгізілетін өзгерістер мен толықтыруларды бекіту туралы» Қазақстан Республикасы Үкіметінің 2013 жылғы 23 шілдедегі № 734 Қаулысы (2016.04.02. берілген өзгерістер мен толықтырулармен) (күші жойылды)

Шетелдіктердің және азаматтығы жоқ адамдардың шекаралық аймаққа кіруіне рұқсаттама беру қағидаларын және Қазақстан Республикасы Үкіметінің кейбір шешімдеріне енгізілетін өзгерістер мен толықтыруларды бекіту туралы
Қазақстан Республикасы Үкіметінің 2013 жылғы 23 шілдедегі № 734 Қаулысы

(2016.04.02. берілген өзгерістер мен толықтырулармен)

ҚР Үкіметінің 2020 жылғы 14 қазандағы № 663 Қаулысымен күші жойылды

Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған:

1) Шетелдіктердің және азаматтығы жоқ адамдардың шекаралық аймаққа кіруіне рұқсаттама беру қағидалары;

2) Қазақстан Республикасы Үкіметінің кейбір шешімдеріне енгізілетін өзгерістер мен толықтырулар бекітілсін.

2. Осы қаулы алғашқы ресми жарияланғанынан кейін күнтізбелік он күн өткен соң қолданысқа енгізіледі.

Қазақстан Республикасы

Үкіметінің

2013 жылғы 23 шілдедегі

№ 734 қаулысымен

бекітілген

Шетелдіктердің және азаматтығы жоқ адамдардың шекаралық аймаққа кіруіне рұқсаттама беру

қағидалары

1. Жалпы ережелер

1. Осы Шетелдіктердің және азаматтығы жоқ адамдардың шекаралық аймаққа кіруіне рұқсаттама беру қағидалары (бұдан әрі - Қағидалар) «Қазақстан Республикасының Мемлекеттік шекарасы туралы» 2013 жылғы 16 қаңтардағы Қазақстан Республикасы Заңының 40-бабына сәйкес әзірленді және шетелдіктер мен азаматтығы жоқ адамдардың шекаралық аймаққа кіруіне рұқсаттама беру тәртібін айқындайды.

2. Шетелдіктердің және азаматтығы жоқ адамдардың шекаралық аймаққа кіруіне осы Қағидаларға 1-қосымшадағы нысанға сәйкес ішкі істер органдары беретін рұқсаттамалар бойынша рұқсат етіледі.

3. Рұқсаттамалардың бланкілерін дайындауды облыстардың, Астана, Алматы қалаларының ішкі істер департаменттері (бұдан әрі - ІІД) жүзеге асырады.

2. Шетелдіктердің азаматтығы жоқ адамдардың шекаралық аймаққа кіруіне рұқсаттама беру тәртібі