-

Осы редакция 2013 жылғы 30 сәуірде енгізілген өзгерістеріне дейін қолданылды

ҚР Үкіметінің 2011.27.08. № 972 Қаулысымен қағидамен толықтырылды

Қазақстан Республикасы

Үкіметiнiң 2001 жылғы 19 маусымдағы

 № 836 қаулысымен бекітілген

Әлеуметтік жұмыс орындарын ұйымдастыру және қаржыландыру
қағидасы

(2012.29.12. берілген өзгерістер мен толықтырулармен)

1. Жалпы ережелер

1. Осы Қағида әлеуметтік жұмыс орындарын ұйымдастыру, қаржыландыру және оларға халықтың нысаналы топтарына жататын азаматтарды жұмысқа орналастыру тәртібін айқындайды (бұдан әрі - Қағида).

2. Әлеуметтік жұмыс орындарына жұмысқа орналасқан азаматтар  және әлеуметтік жұмыс орындарын ұйымдастырған жұмыс берушілер туралы мәліметтер «Еңбек нарығы» автоматтандырылған ақпараттық жүйесінде орналастырылады.

2. Әлеуметтік жұмыс орындарын ұйымдастыру

3. Әлеуметтік жұмыс орындары жұмыс берушілерде олардың меншік нысанына қарамастан ұйымдастырылады.

4. Әлеуметтік жұмыс орны уақытша жұмыс орындарын құру арқылы ұйымдастырылады және мынадай ерекшеліктері бар:

1) арнайы нысаналы топтарға арналған;

2) жұмыс орындарының саны шектелмеген, жұмыс уақытша сипатта болады және оны ұйымдастыру үшін тұрақты жұмыс орындары мен бос жұмыс орындарын пайдалануға болмайды.

ҚР Үкіметінің 2012.30.03. № 378 Қаулысымен 5-тармақ өзгертілді (бұр.ред.қара)

5. Уәкілетті орган және/немесе халықты жұмыспен қамту орталығы:

1) жұмыс берушілерге әлеуметтік жұмыс орындарын құру және қаржыландыру мәселелері бойынша консультация береді;

2) жыл сайын, 10 қаңтарға дейінгі мерзімде әлеуметтік жұмыс орындарын ұйымдастыратын жұмыс берушілерден осы Қағидаға 1-қосымшаға сәйкес нысан бойынша өтінім жинауды жүзеге асырады;

3) барлық ұсынылған өтінімдер үш жұмыс күні ішінде бірыңғай тізбеге жинақталып, тиісті ауданның (облыстық, республикалық маңызы бар қаланың, астананың) уәкілетті органына қарауға және бекітуге ұсынылады.