(БҰРЫНҒЫ РЕДАКЦИЯ) ҚР ҮКІМЕТІНІҢ 2007 ЖЫЛҒЫ 1 ҚАЗАНДАҒЫ № 863-1 ҚАУЛЫСЫ

Жер қойнауын пайдалануға арналған келісім-шарттар талаптарының орындалуын сақтау мониторингін
және оны бақылауды жүзеге асыру ережесін бекіту туралы
Қазақстан Республикасы Үкіметінің 2007 жылғы 1 қазандағы № 863-1 Қаулысы

Осы редакция 2010 жылғы 20 мамырда енгізілген өзгерістеріне дейін қолданылды

«Жер қойнауы және жер қойнауын пайдалану туралы» Қазақстан Республикасының 1996 жылғы 27 қаңтардағы Заңының 7-бабының 13) тармақшасына сәйкес Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған Жер қойнауын пайдалануға арналған келісім-шарттар талаптарының орындалуын сақтау мониторингін және оны бақылауды жүзеге асыру ережесі бекітілсін.

2. Осы қаулының орындалуын бақылау Қазақстан Республикасы Энергетика және минералдық ресурстар министрлігіне жүктелсін.

3. Осы қаулы қол қойылған күнінен бастап қолданысқа енгізіледі.

Қазақстан Республикасы

Үкіметінің

2007 жылғы 1 қазандағы

№ 863-1 қаулысымен

Бекітілген

Жер қойнауын пайдалануға арналған келісім-шарттар

талаптарының орындалуын сақтау мониторингін және оны

бақылауды жүзеге асыру ережесі

1. Жалпы ережелер

1. Осы Ереже «Жер қойнауы және жер қойнауын пайдалану туралы» Қазақстан Республикасының 1996 жылғы 27 қаңтардағы Заңына сәйкес әзірленді және жер қойнауын пайдалануға арналған келісім-шарттар талаптарының орындалуын сақтау мониторингін және оны бақылауды жүзеге асыру тәртібін белгілейді.

2. Келісім-шарттар талаптарының орындалуын сақтау мониторингі келісім-шарттар талаптарының орындалуын сақтауды бақылауды қамтамасыз ету мақсатында жер қойнауын пайдаланушылардың келісім-шарттар бойынша міндеттемелерін іске асыру барысы туралы ақпаратты жинау мен қорыту жөніндегі қызметті қамтиды.

3. Келісім-шарттар талаптарының орындалуын сақтауды бақылау жер қойнауын пайдаланушылардың келісім-шарттар талаптарын орындауын қамтамасыз ету жөніндегі қызметті қамтиды.

4. Келісім-шарттар талаптарының орындалуын сақтау мониторингін және оны бақылауды құзыретті органдар жүзеге асырады.