"Каспиймұнайгаз" Каспий мемлекеттік мұнай және газ өнеркәсібі
ғылыми-зерттеу және жобалау институты" мемлекеттік мекемесін
қайта ұйымдастыру туралы Қазақстан Республикасы Үкіметінің
2001 жылғы 28 маусымдағы № 887 қаулысы
(ҚР Үкіметінің 13.12.01 ж. № 1633; 28.10.04 ж. № 1105
қаулыларымен енгізілген өзгерістерімен)

(Бұр. ред. қара)

"2000-2001 жылдары жекешелендіруге жататын республикалық мемлекеттік кәсіпорындар мен мекемелердің тізбесі туралы" Қазақстан Республикасы Үкіметінің 2000 жылғы 17 маусымдағы № 912 қаулысына сәйкес Қазақстан Республикасының Үкіметі қаулы етеді:

1. Қазақстан Республикасы Энергетика және минералдық ресурстар министрлігінің "Каспиймұнайгаз" Каспий мемлекеттік мұнай және газ өнеркәсібі ғылыми-зерттеу және жобалау институты" мемлекеттік мекемесі жарғылық капиталға мемлекеттің жүз пайыз қатысуымен "Каспиймұнайгаз" ғылыми-зерттеу және жобалау институты" ашық акционерлік қоғамы (бұдан әрі - Қоғам) етіп қайта құру жолымен қайта ұйымдастырылсын.

2. Қоғам қызметінің негізгі мәні ғылыми-зерттеу және жобалау жұмыстарын жүргізу болып белгіленсін.

3. Қазақстан Республикасы Қаржы министрлігінің Мемлекеттік мүлік және жекешелендіру комитеті заңнамада белгіленген тәртіппен:

1) Қоғамның жарғысын бекітсін және оның мемлекеттік тіркелуін қамтамасыз етсін;

2) Қазақстан Республикасының Энергетика және минералдық ресурстар министрлігіне Қоғам акцияларының мемлекеттік пакетіне иелік ету және пайдалану құқығын берсін;

3)

4) осы қаулыдан туындайтын өзге де шараларды қабылдасын.

ҚР Үкіметінің 2001.12.13. № 1633 қаулысымен 3)-тармақша алып тасталды

4. Қазақстан Республикасы Үкіметінің кейбір шешімдеріне мынадай толықтырулар мен өзгеріс енгізілсін:

1) "Акциялардың мемлекеттік пакеттеріне мемлекеттік меншіктің түрлері және ұйымдарға қатысудың мемлекеттік үлестері туралы" Қазақстан Республикасы Үкіметінің 1999 жылғы 12 сәуірдегі № 405 қаулысына (Қазақстан Республикасының ПҮКЖ-ы, 1999 ж., № 13, 124-құжат):

көрсетілген қаулымен бекітілген Акцияларының мемлекеттік пакеттері мен үлестері республикалық меншікке жатқызылған акционерлік қоғамдар мен шаруашылық серіктестіктердің тізбесінде:

"Атырау облысы" бөлімі мынадай мазмұндағы реттік нөмірі 145-1-жолмен толықтырылсын:

"145-1.                   "Каспиймұнайгаз" ҒЗЖИ" ААҚ";

2) "Республикалық меншіктегі ұйымдар акцияларының мемлекеттік пакеттері мен мемлекеттік үлестеріне иелік ету және пайдалану жөніндегі құқықтарды беру туралы" Қазақстан Республикасы Үкіметінің 1999 жылғы 27 мамырдағы № 659 қаулысына:

көрсетілген қаулыға қосымшада:

"Қазақстан Республикасының Энергетика және минералдық ресурстар министрлігіне" бөлімі мынадай мазмұндағы реттік нөмірі 44-жолмен толықтырылсын:

     "44.                 "Каспиймұнайгаз" ҒЗЖИ" ААҚ";

3) ҚР Үкіметінің 28.10.04 ж. № 1105 қаулысымен күші жойылды (бұр.ред. қара)

5. Осы қаулы қол қойылған күнінен бастап күшіне енеді.

Қазақстан Республикасының

Премьер-Министрі