(БҰРЫНҒЫ РЕДАКЦИЯ)

Қазақстан Республикасында бейбiт жиналыстар, митингiлер, шерулер,

пикеттер және демонстрациялар ұйымдастыру мен өткiзу тәртiбiтуралы

Қазақстан Республикасы Президентiнiң 1995жылғы 17 наурыздағы № 2126 заң күші бар Жарлығы

Осы редакция 2004 жылғы 20 желтоқсандағы № 13-III ҚР Заңымен енгізілген өзгерістеріне дейін қолданылды

"Қазақстан Республикасының Президентi мен жергiлiктi әкiмдерге уақытша қосымша өкiлеттiк беру туралы" 1993 жылғы 10 желтоқсандағы Қазақстан Республикасы Заңының 1-бабына сәйкес әрi жиналыстар, митингiлер, шерулер, пикеттер және демонстрациялар ұйымдастыру мен өткiзу тәртiбiн реттеу мақсатында осы Жарлықты шығарамын:

1-бап. Заңдарда жиналыстар, митингiлер, шерулер және демонстрациялар деп аталатын қоғамдық, топтық және жеке мүдделер мен қарсылық бiлдiрудiң нысандары ретiнде, сонымен қатар қоғамдық орындарда аштық жариялауды, киiз үйлер, шатырлар, өзге де құрылыстар тұрғызуды және пикет қоюды түсiну керек.

2-бап. Жиналыс, митинг, шеру, пикет немесе демонстрация өткiзу туралы жергiлiктi атқарушы органға өтiнiш берiледi.

Жиналыс, митинг, шеру, пикет немесе демонстрация өткiзу туралы өтiнiштердi еңбек ұжымдарының, қоғамдық бiрлестiктердiң немесе Қазақстан Республикасы азаматтарының жекелеген топтарының он сегiз жасқа толған уәкiлдерi бередi.

3-бап. Жиналыс, митинг, шеру, пикет немесе демонстрация өткiзу туралы өтiнiш оны өткiзудiң белгiленген датасынан кемiнде он күн бұрын жазбаша нысанда берiледi. Өтiнiште шараны өткiзу мақсаты, нысаны, өткiзiлетiн жерi немесе қозғалыс маршруттары, оның басталатын және аяқталатын уақыты, қатысушылардың ықтимал саны, уәкiлдердiң (ұйымдастырушылардың) және қоғамдық тәртiптiң сақталуына жауапты адамдардың тегi, аты, әкесiнiң аты, олардың тұратын және жұмыс iстейтiн (оқитын) жерi, өтiнiштiң берiлген датасы көрсетiледi. Өтiнiштiң берiлген мерзiмi оның жергiлiктi атқарушы органда тiркелген күнiнен бастап есептеледi.