«Борышкердің мүлкін (активтерін) сату жөнінде сауда-саттық жүргізу ережесін бекіту туралы» Қазақстан Республикасы Үкіметінің 2006 жылғы 26 сәуірдегі № 326 қаулысына өзгерістер енгізу туралы» Қазақстан Республикасы Үкіметінің 2012 жылғы 20 маусымдағы № 809 Қаулысы (күші жойылды)

«Борышкердің мүлкін (активтерін) сату жөнінде сауда-саттық жүргізу ережесін бекіту туралы» Қазақстан Республикасы Үкіметінің 2006 жылғы 26 сәуірдегі № 326 қаулысына өзгерістер енгізу туралы
Қазақстан Республикасы Үкіметінің 2012 жылғы 20 маусымдағы № 809 Қаулысы

ҚР Үкіметінің 2014 жылғы 8 шілдедегі № 777 Қаулысымен күші жойылды

Қазақстан Республикасының Үкіметі ҚАУЛЫ ЕТЕДI:

1. «Борышкердің мүлкін (активтерін) сату жөнінде сауда-саттық жүргізу ережесін бекіту туралы» Қазақстан Республикасы Үкіметінің 2006 жылғы 26 сәуірдегі № 326 қаулысына (Қазақстан Республикасының ПҮАЖ-ы, 2006 ж., № 15, 143-құжат) мынадай өзгерістер енгізілсін:

көрсетілген қаулымен бекітілген Борышкердің мүлкін (активтерін) сату жөнінде сауда-саттық жүргізу ережесінде:

4, 6, 9 және 10-тармақтар мынадай редакцияда жазылсын:

«4. Сату жоспарын сатушы түгендеу деректерінің және борышкердің конкурстық массасын бағалау негізінде осы Ережеге 1-қосымшаға сәйкес жасайды.

Ауыл шаруашылығы ұйымы болып табылатын борышкердің мүлкін (активтерін) сату жоспары міндетті түрде қызметінің негізгі түрін сақтай отырып, борышкердің мүлкін бастапқыда аукционға бірыңғай лотпен шығару туралы қосымша шартты қамтиды.

Сату жоспарына: түгендеу актісі, бағалау актісі (бағалауды жүргізген кезде) немесе мүлікті теңгерімдік құны бойынша қоюға келісу туралы кредиторлар комитетінің хаттамалық шешімі, құқық белгілейтін құжаттар, сондай-ақ қолданыстағы заңнамада көзделген жағдайларда, заңнамада белгіленген тәртіппен алынған мүлікке (активтерге) құқықты іске асыруға мемлекеттік органдардың жазбаша келісімі қоса беріледі.

Сату жоспарын борышкердің кредиторлар комитеті бекітеді.»;

«6. Бағалаушыны тарту конкурстық негізде бағалау ұсыныстарына сұрау салу әдісімен осы Ережеге 2-қосымшаға сәйкес ақпараттық хабарлама қазақ және орыс тілдерінде Қазақстан Республикасының бүкіл аумағына немесе борышкер және (немесе) оның мүлкі орналасқан жер бойынша тиісті облыста (республикалық маңызы бар қалада) таратылатын мерзімді баспасөз басылымдарында жариялана отырып, жүргізіледі.